SAN ESTEBAN, Ilocos Sur – Baro a biag iti mangngalap a taga-Barangay Bateria ditoy nga ili kalpasan a nalasatanna ti  panagkatangkatangna iti nadawel a taaw idi Hunio 20.

Segun iti report, nagpataaw idi rabii ti Hunio 19 ni Tata Roming Magno, 70, residente iti nadakamat a barangay,  inyawidna dagiti iket iti agsapa, sa  nagrakit a nagsubli iti taaw tapno mapanna alikumkomen dagiti dadduma a naipakat nga iketna ngem saanen a nakaawid gapu iti napigsa nga angin ken dalluyon.

SAN JUAN, Abra – Naisingasing bayat ti session ti hunta probinsial a naangay idi Hunio 19 ditoy nga ili ti panangpatronahe dagiti empleado ken estudiante dagiti bukod a produkto ti probinsia.Daytoy ti maysa a naipangruna a natratar iti naisayangkat nga out of town session ti hunta probinsial nga indauluan ni Bise Gobernador Rolando Somera babaen ti panangsangaili ida ti lokal a gobierno nga idadauluan ni Mayor Marco Bautista ken ti sangguniang bayan nga idadauluan ni Bise Mayor Rosalinda Billeda.

CANDON CITY – Tallupulo ket siam a mannalon a nauraman iti pugon ti inikkan ni Congressman Eric Owen Singson iti tulong a pinansial itay nabiit.

Kinuna ni Estrella de Peralta, branch manager ti National Tobacco Administration-Candon Branch a naikkan dagiti mannalon iti sag-P10,000.00 a tulong.

Kinunana a naited ti pinansial a tulong tapno makasubbot dagiti mannalon iti pukawda iti idadapo ti pugonda bayat ti panaglutoda iti tabako.

SAN ESTEBAN, Ilocos Sur – Agdagup 180 nga ubbing a nagbasa iti Day Care ditoy idi napalabas a tawen ti winarasan ti Municipal Social Welfare and Development iti nasustansia a taraon itay nabiit.

Mismo a ni Mayor Chester Elaydo ti nangted kadagiti taraon kadagiti ubbing.

Kinuna ni Rosa Guarte, MSWD Officer, a gatas, tsokolate, oats, noodles, asukar, ken dadduma pay a nasustansia a taraon ti naited kadagiti ubbing a kaadduanna nga agbasbasa itan iti prep school.

BUTOS PARA NEW 7 WONDERS CITIES. Kadua ni Pambansang Kamao ken Congressman Manny Pacquiao da Gov. Luis “Chavit” Singson ken Vigan City Mayor Eva Marie S. Medina a nangisenias ti Number 1 kas panangikampaniada ti pannakaibutos ti Siudad ti Vigan tapno mairaman iti New7Wonders Cities. Kangrunaan a sangaili ni Gov. Singson iti panagkasangayna idi Hunio 21 ti boxing icon a nagkampeon iti 8 a dibision. Ti Vigan ti kakaisuna nga indeklara ti UNESCO a kakaisuna a World Heritage City iti sibubukel a pagilian. (ladawan: Dante Tacata/teksto: Mancielito S. Tacadena)