NAGA CITY - Pagbabago para sa ikakarahay kan gabos an promesa ngonian kan bagong tukaw na Commanding Officer kan 49th Infantry Batallion (IB) Philippine Army sa probinsya kan Camarines Norte.
Ini kasunod kan turn-over ceremony na isinagibo subagong aga sa 49th IB kun saen pormal nang nagtukaw sa pwesto si Lt. Col. Michael Buhat karibay kan sinikadan na si Lt. Col. Epimaco Macalisang.
Sa entribista kan Bombo Radyo Naga ki Buhat, pigsierto kaini na pagpapahigot kan seguridad sa saiyang nasasakupan ta nganing malikayan na su boot an mga bayolensyang dara kan pag-atake kan mga rebeldeng New People's Army (NPA).
Susog sa saiya, kaiba na sa saindang trabaho an siring na mga labanan alagad kun mapupuede, mawot niya su boot ining malikayan.
Paramientras man na matenir sa 9th Infantry Division (ID) sa Pili, Camarines Sur si Macalisang mantang mayo pa sa saiyang panibagong ipigtataong pwesto.
Marurumduman na nasikadan si Macalisang makalihis na magadan an apat na mga suldados asin sarong sibilyan mantang duwang iba pa an nalugadan sa pananakyada kan mga rebelde sa Labo, Camarines Norte kan nagtalikod na aldaw.
Mientras tanto, naihatod na man subagong udto sa saiyang huring destinasyon an bagong kasal na si PFC Teodoro Ojeda na saro sa mga nagadan sa naunambitan ng engkwentro.
Source: