ING METUNG a matino at epektibung talaturu e ya tutucnang quing nanu na mu ing abalu na at quing nanu na mu ing balu na, bagcus cailangan na ing alang tucnang a pamagaral at pamibalu caring dacal pang bague a dapat nang paquibaluan quing cayang piniling propesiun at cayausan. 

Ibat caniting caisipan nun inia ngening casalucuyan paca-siguraduan cu ing conectadu cu pa mu ring caring mengalabasan cung disipulus, acayabe quing obra at quing propesiun at cayasua'na ning pamanuru, at maguing caring dati cung meastru at maestra at macanian mu naman caring dati cung "boss" caring escuelang pibatan cu. 

Macapagmulala ing canacung meguing relasyun careting miyayaliuang taung meguing daque na ning bie cu anting estudyanti at anting talaturu. (Salamat quing Internet.) E cu abitasa at ganap a asambitla quing minsan mung pamaniulat ing anggang meguing contribusiun da reting anggang taung a reti quing paniulung cu e mu anting estudyanti at talaturu, nung maguing anting tau at disipulus ning yatu. 

Minsan acutna'na cu ning dati cung cayabe quing cayausa'na ning pamanuru (a casalucuyang tuturu quing America ngeni) nung nanu la ngan canu ring sablang maulagang bague a cailangan mi pang abalu o paquibaluan ban mas sumulung que pa anting talaturu ning legua'ning amanu o Language Arts o Communication Arts. Mequibat cung agad caya, dapot iti pa mu yang apaquibat cu caniting masaquit a cutang na:  

"Dinan mu cu pang mapilan a aldo ban pigunaman queng masalese ini nang cutang mu canacu. E cu bisang mag-bisu-bisu quing ipaquibat cu queca, uling balu cu quing quelalama'na ning canacung pusu, isip, at caladua ing mangailangan yang sapat a panaun ban atapucanan queng mitmung caustuan a atensiun at pami-isip ing cutang mung a'ini canacu. E cu bisang magcamali quing maguing paquibat cu queca, pablasang asabi mu ing maguing maulaga ya queca ing canacung ipaquibat caniting cutang mu." 

Caibat ning mapilan a aldo, ayari que ing paquibat cu caya quing amanung Inglis at Tagalug, at bilang saup cu quing amanung sisuan, pigcapilitan queng ilicas quing amanu cung sisuan iti nang meguing paquibat cu quing cutang nang ini canacu. Pignasan cung tutu ing idaque que quing ANASI iti nang licas-amanung paquibat cu ban quing dimut cu mu mang ambag, maca-ibie cung cusing cu quing paniulung da ring calupa cung talaturu, talapamasa, at talasulat... at miguit quing sable, caring calupa cung disipulus na ning yatu. 

* 

Ring Dapat Cung Abalu Anting Talaturu Ning Amanu 

Mumunang dili, cailangan cung maguing talapamasa ("reader" ing buri cung ecsactung sabian queni). Nung acu mismu e cu talapamasa da ring malauac a materialis manibat quing casalucuyan at quing milabasan, macananu cung abalu nung tungcul nucarin ing dapat cung isulat at e dapat isulat, at nung tungcul nucarin ing dapat cung ipasulat at e dapat ipasulat caring canacung disipulus, at nung macananu cong isulat deti at ipasulat deting miyayaliuang pacsa caring canacung abasa at ababasa? Nung acu mismu e cu talapamasa, macananu cung abalu nung nanu la ring librung maliaring aburian da ring canacung disipulus? Nga cu pin quing original cung paquibat, "If I am not a reader, how will I be able to keep up with the theoretical developments in my field?" Nung e cu talapamasa, macananu cung apaquit caring canacung disipulus a ing pamamasa metung yang cararaptanan a tutung capaqui-paquinabang at dapat queng i-recomenda carela caba ning bie ra? Nga cu na pin, pasibayu, quetang original cung paquibat, "If I am not a reader myself, how will I understand the ethnic tensions, the political debates, or the moral values and expectations of society?" At nung acu mismu e cu talapamasa, tutu lang maguing dacal ring pilatan quing canacung educasiun at caring canacung capanandaman diquil quing pamamasa, at e cu capilan man mica-sicanan a lub ausan que ing canacung sarili anting talaturu ning ausan tamu ngening "Whole Language” o Cabiluga'ning Amanu. 

Cadua caniti, cailangan cung maguing talasulat. Nung acu mismu e cu talasulat (at ni e cu regular a susulat), e cu aintindian capilan man ing saquit o ing casaquita'na ning susulat o ning pamaniulat. Nung acu mismu e cu talasulat, e co capilan man abalu ring tacut at capanayan da ring talasulat a tuturu cu caring canacung disipulus. Nung acu mismu e cu talasulat, e cu maguing mulat caring pamangailangan da ring talasulat: ring pamangailangan calupa na ning tune layun para quing pamaniulat, ring tune beluan quing "grammar, spelling,” ampon "punctuation" ban gauan yang istu at masalese ing metung a casulatan. Nung acu mismu e cu talasulat, e cu capilan man abalu ing catutuan a ing pamaniulat metung yang masaya at mabayat a jamun at cararaptanan. At nung acu mismu e cu talasulat, nga cu na pin quetang original cung paquibat, "I will lack the first-hand insights into the writing process that I should not dare to call myself a teacher of the Whole Language." 

Cailangan cung macapagsalita at macasulat mitmung caustuan (quing amanung tuturu cu). (Ngeni, ninu pa caya caring talaturu tamu ngeni caring pampublicung escuela ring macaturu quing istung pamaniulat at pamagsalitang Capampangan?) Nung e co man agyung gamitan mitmung caustuan ring amanu, capaltan at capaltan cung sicanan quing bie cu; at mas maulaga pa quesa caniti, e co aturu ring canacung disipulus caring bagueng dapat at cailangan dang abalu ban ila mismu maguing masicanan lang talasulat at tala-gamit na ning amanu. Nung e cu man susubucnan sumulat at nung ala cung sipagan sumulat, dapat cu sigurung dumine a ausan que ing sarili cung metung a talaturu ning Whole Language. 

Cailangan cung macalalang metung a comuninad da ring mabibiasa("community of learners" ya ing buri cung sabian queni). Nung anting metung a talaturu ning amanu, e co balu ring balang metung caring canacung disipulus anting metung a taung mabibiasa, dumistancia la canacu reti at e da tune burian ing mabiasa la. Nung e cu mamuclat carela nung ninu acu anting talapamasa at talasulat, e ra cu pagcatiualan anting talaturu da at anting calupa rang lelangan a atin mu namang queinan at sicanan, cabiguan at pamag-uagi; maguing limitadu ing carelang "learning engagement" quing clasi cu. Nung e cu mibuung matiguit a comunidad da ring mabibiasa quing clasi cu, macananu cong acuang apaimbulug ring bagueng daralana'na ning pusu o capanandaman ban apalabungan co ring bagueng daralana'na ning utac quing canacung pamanuru? Nung e co ngan buri ring miyayaluang clasi da ring tau, at nung e co tatanggapan reti nung ninu ila, e que siguru dapat ausan ing sarili cu anting talaturu ning Whole Language. 

Cailangan cu nong iugse ring e macatutuanang actividades a sepupuan cu quing macabang panaun (I should throw out all the unreal language activities that I have acquired over the years). Nung ing gagauan cu mu anting talaturu ya pin ing babie cung worksheets o obra caring papil a mayayaquit nang tambing caring libru (a tutung dacal camalian caring queraclan careti), macananu lang mabiasang sumulat macabaldugan at mangacaba ring canacung disipulus? (Nun inia pin e na macapagtaca ngening casalucuyan a panaun nung tutu lang dacal caring mamagaral ngeni---lalu na caring pampublicung escuela---ring mangaina quing ausan tamung oral and written facilities of expression, maguing quing antas o lebel ning colegiu.) Tutu ya ing sinulat na ning metung a Australian educator and published author a quinonsulta cu tungcul caniting pacsa a maralas cung casabi "online", ngana: "If you rely on basal readers to teach reading, how will your students know that mastering reading is a terrifically worthwhile activity?" At nung maniayang cung panaun careting alang-cabaldugan a obrang-papil a reti quing canacung pamanurung sumulat, e cu pin mica-panaun miturung "real language" o "tune amanu," a maguing sumbagal quing canacung dapat a maging layun a maguing metung a talaturu ning Whole Language. 

Cailangan cung tandanan a lalaqui la at babai ring canacung disipulus at menibatan la reti caring miyayaliuan cultura. Nung e cu pareju paglalaue caring lalaqui at babai, mapaliaring miapectuan ya ing canacung pamamie obra-literatura para caring e cu papaboran. Pasibayu, pabustan yung idaque que quecayu ing sinulat na canacu niting Australian rducator and published author a casabi cu online tungcul caniting aspetu ning pamanurung amanu: "If you forget to focus on the girls, you'll constantly be thinking of how to keep the boys interested, to the detriment of the girls' development as persons and as users of language. If, with, the boys, you focus exclusively on developing so-called male attributes, they won't be able to reach their potential as fully rounded human beings. If you're racist or classist, you will be denying important areas of development in the lives of your students." Macananu queng ayaus canita ing sarili cu anting metung a taluturu ning Whole Language? 

Cailangan cung maguing epectibung talapasiag at metung a masusing maquiramdam. Nung e cu biasang maquiramdam caring canacung disipulus, isipan da ing alang casu nung e la naman maquiramdam canacu. Nung e cu agyung maguing modelu ning cagalangan na ning tajimic a atensiun (silent attention) potang magsalita la ring aliua, macananu rang abalu mismu canacu a ing pamaquiramdam metung yang dapat a pagnasan at masaquit paquibaluan? Macananu rang abalu ring canacung disipulus nung nanu ing buri nang sabian ning maguing metung a interesanting talapagsalita nung e cu maguing modelu na niti? Nun inia sa't nga cung sinulat quetang original cung paquibat quing calupa cung talaturu ning amanu: "If I speak with sloppy pronunciation, careless construction, and a limited vocabulary, how will my students be able to observe what it means to be an effective speaker? If I read aloud in a monotone, at an unchanging speed, and with an unvarying volume, how will I capture attention and hold it? If I am so bad a listener and so dull a speaker that my students riot with boredom, can I call myself then a successful teacher of Whole Language? 

Cailangan queng asajan ing yatu caring canacung disipulus. Nung e la malino canacu ring canacung asajan caring canacung disipulus at nung nanu ing dapat cung paquiduang carela, macananu rang abalu nung nanung carelang paquiabutan? Nung e que ibie carela ing pecamatas cung asajan carela, macananu cung asajan quing daratang a panaun a rening tutuquing dai da ring manibala quing yatung minsan cung ticnangan at pigcapilitan palabungan at pacamalan tune la ping macasadiang obran iti nang marangal a casuyuan? Macananu yang munlad ing bansa cu nung e cu binie ing peca-matas cung dapat asajan careting tutuquing dai da ring manibala quing canacung balayan? Nga cu na pin maralas sasabian caring canacung disipulus, "If you don't reach for the stars, you might be killing your potentials." At minsan asabi cu naman quing metung a cayabe cu caniting cayausa'na ning pamanuru, "If you're not drawing out the best from your students, you're not nearly as good a teacher of Whole Language as you think you are." 

Catataulian, sucat cung tandanan a ing balang obra na ning pamanuru metung ya namang obra na ning pamanialicsic (Every piece/work of teaching is a piece/work of research). Caniting tauling dapat cung abalu tungcul quing pamanuru, pabustan yung idaque que quecayu ing meguing payul na canacu niting Austrialian educator and published author tungcul caniting pisasabian, ngana: "When (and not if) you make ghastly mistakes, don't fall into a heap: learn from those mistakes. Teaching, like any other art, is an endless cycle of trial and error. If you imagine you will one day have the whole game sewn up, think again and keep thinking. And keep reading and discussing, and changing and experimenting. The best "teacher" you will ever have is careful reflection on your own experience as a teacher of whole language in your own classroom." At caniting payul na canacu, ing apasiag cu mu ya pin ing metung a masican a "Amen!" 

* 

Cabang babasan co reting listajan da ring dapat cu pang paquibaluan at paquiabutan a panugali na ning metung a talaturu ning amanu, aganaca queng mitmung capaldanan quing salu cu ing sinulat nang Robert Louis Stevenson: "To travel hopefully is a better thing than to arrive." Ing metung a matino at matenacan a talaturu metung yang malaut a pamaglacbe, dapot nung atin tamung sapat at istung beluan, sipagan, sigasig, maca-panaun a teorya, cararaptanan, saglaue at masalang parasan caring quecatamung pusu at caisipan anting talaturu ning amanu, cayabe ne queni ing suporta na ning metung o aduang masigasig a cayabe quing cayausa'ning pamanuru, ing pamaglacabeng a'ini sucat yang maguing mabunga at interesanti. 

Nasa cu ing acayabe ra co sana. 

 Source: http://eksite.com/