SAN ESTEBAN, Ilocos Sur – Baro a biag iti mangngalap a taga-Barangay Bateria ditoy nga ili kalpasan a nalasatanna ti  panagkatangkatangna iti nadawel a taaw idi Hunio 20.

Segun iti report, nagpataaw idi rabii ti Hunio 19 ni Tata Roming Magno, 70, residente iti nadakamat a barangay,  inyawidna dagiti iket iti agsapa, sa  nagrakit a nagsubli iti taaw tapno mapanna alikumkomen dagiti dadduma a naipakat nga iketna ngem saanen a nakaawid gapu iti napigsa nga angin ken dalluyon.

Kinuna ni Tata Roming a natalna pay met laeng ti baybay idi agpataaw ngem kellaat lattan a pimmigsa ti angin nga arig nanglukot iti rakit ken nangirareb kenkuana.

Kinuna ti lakay nga inggalutna ti bagina iti rakit ket daytoy ti nagbalin a salbabidana tunggal dumuprak ti dakkel a dalluyon.

Saan nga immibbet ti lakay iti rakitna agingga nga impaigid ida ti dalluyon iti Barangay Lingsat, Sta. Maria.

Source: TAWID NEWS TEAM

http://www.tawidnewsmag.com/2012/06/mangngalap-naitawtaw-iti-baybay-gapu-iti-napigsa-dalluyon/