SIUDAD ITI SAN FERNANDO, La Union, Mayo 16 (PIA) -- Nagsanay dagiti kameng ti pulis ditoy La Union ti panagpatubo ti maimula kayo wenno seedling production a kas paset ti pinirmaanda a Memorandum of Agreement ti nagbaetan ti Department of Environment and Natural Resources – Ecosystem Research and Development Sector (DENR-ERDS) ken ti Philippine National Police (PNP) para ti panagsuportada ti National Greening Program (NGP). 

Naaramid ti dua nga aldaw a panagsanay idiay Camp Diego Silang, Carlatan ditoy siudad idi napalabas a bulan ti Abril. Datoy a panagsanay ket maipanggep ti panagpatubo iti kayo ken panagmentenar iti kaykayo ti kabakiran, indigenous trees ken fruit trees. 

Taga-DENR-ERDS dagfiti nangidaulo ti panangisuro ken nagsanay kadagiti partisipantes. 

Datoy a panagsanay ket tapno maisagana dagiti partisipante a magunggunaan wenno manayonan pay ti pagsiribanda ken paglainganda tapno maikkan ti importansia dagiti nadumaduma a kaykayo ti kabakiran ken kita ti indigeneous a kaykayo kasta met dagiti sumagmamano a teknolohia ti organic farming, nangnangruna ti produksyon ti liquid fertilizer ken pesticide nga mangmentenar dagiti nursery seedlings. 

Datoy nga aktibidad ket maipadada iti proyekto ti PNP a napanaganan “Pulis Makakalikasan: 10 milyong Puno, Pamana sa Kinabukasan.” 

Inaramid ti DENR dagiti materyales para dagiti aktibidades iti panagmulaan ti kayo a kas naisaad ti MOA, ngem dagiti bunubon a kasapulan ti datoy a tawen ket naikomitdan a nasapsapa kadagiti nadumaduma a kliyente ti ahensiya. 

Dagiti kameng ti pulisya ket agaramidda ti balaya pagpatubuan wenno nurseries iti uneg ti kampo ti PNP, ken tumulong ti empleyado nga aggapu ti DENR a mangammo ti kita ti kayo a maikari para ti panagmulaan a kas naisaad ti agdama a panawen ken kondisyon ti daga ti nasao a lugar. Daytoy ket makatulong ti problema ti pagkurangan iti bunubon. 

Datoy panagmulaan ti kayo ket nagaramid ti PNP iti kabukbukudanda a wagas tapno makatulongda a mapabassit ti epekto ti panagbalbaliw ti klema wennoclimate change ditoy aglawlaw, kuna ni Deputy Provincial Director for Operations PSupt. Robert Mesa. 

Ti proyekto a Pulis Makakalikasan ket agpatingga inton Pebrero 28, 2013. Mairaman ti 140,000 nga empleyado ti PNP nga agmula iti agarup 72 tree seedlings kada empleyado wenno innem a kayo a bunubon kada bulan para ti maysa a tawen. (ANL/EMR-PIA1, La Union) 

Source: http://www.pia.gov.ph/news/index.php?article=321337045388