“I AM READY. Mao man gyud na ang reality sa politics.”

Mao ni ang reaksiyon ni Bise Gobernador Agnes Magpale labot sa mamahimong sangputanan sa relasyon nila tali ni Gobernador Gwen Garcia human gi-report nga nahulma na ang alyansa tali sa Liberal party ug Barug Alang sa Kauswagan ug Demokrasya (Bakud) ug ang panagpares nila ni LP Cebu provincial chairman Atty. Hilario “Junjun” Davide III.

Iyang gibutyag nga duna na gyuy nakab-ot nga desisyon ang ilang pangu sa Bakud party nga si Danao City Vice Mayor Ramon “Nito” Durano III apan naunhan lang gyud og report sa media.

Si Garcia sa iyang bahin nipasalig nga dili maapektuhan ang iyang mga responsibilidad isip usa ka gobernador sa pagbungkag na sa alyansa sa One Cebu tali sa Bakud party.

“I’ve never allowed my personal feelings to affect my responsibilities as governor, and to affect my demeanor in extending courtesy to a fellow public official,” matod niya dihang nahinabi sa mga tigbalita sa Kapitolyo.

Sa habig ni Kongresista Pablo John Garcia, gubernatorial candidate sa One Cebu ug ka-tandem unta ni Magpale sa 2013 election, siya niingon ang mamahimong epekto lang niini mao ang alyansa sa duha ka partido.

Atol sa pinirmahay sa memorandum of agreement sa Cebu Provincial Anti Drug Abuse
Commission kagahapon sa Cebu International Convention Center, nagkuyog ang tulo ka nahisgutang mga opisyal kauban si Deputy Speaker Pablo Garcia.

Source: Sheila C. Gravinez

http://www.sunstar.com.ph/superbalita-cebu/balita/2012/06/26/magpale-andam-sa-unsay-sangkoan-228830